വള്ളോന്‍ എന്ന വള്ളുവര്‍ പറയിപെറ്റ പന്തിരുകുലത്തിലെ രണ്ടാമത്തെ പ്രജയാണ്‌. നാടുവിട്ട്‌ പരദേശങ്ങളിലൂടെ, ജ്ഞാനത്തിന്റെ ഉറവിടങ്ങളിലൂടെ അലഞ്ഞും അന്വേഷിച്ചും വിദ്യാപാരംഗതനായിത്തീരുന്ന വള്ളോന്‍ ജ്യേഷ്‌ഠസഹോദരനായ അഗ്നിഹോത്രിയാല്‍ സ്ഥാപിതമായ സരസ്വതീക്ഷേത്രത്തില്‍ ഗുരുനാഥനാകുന്നു. അഗ്നിഹോത്രിയുടെ ദേഹത്യാഗാനന്തരം വള്ളുവര്‍ തന്റെ യാത്ര തുടരുന്നു. പുണ്യഹിമാലയത്തിലേക്കുവരെ നീളുന്നു ആ മഹായാത്ര.

കുന്നിന്‍നിറുകയിലേക്ക് ഉരുട്ടിക്കയറ്റിയ പാറക്കല്ല് താഴേക്കുന്തിയിട്ട് അത് പൊട്ടിച്ചിതറുന്നതു കണ്ട് ആര്‍ത്തുചിരിച്ച നാറാണന്‍! ആ ഭ്രാന്തന്‍ വേദാന്തിയുടെ, മഹാസത്യങ്ങളെ സരസമായി ആവിഷ്‌കരിച്ച ആ പെരുംജ്ഞാനിയുടെ ജീവിതപ്പാതകള്‍. രായല്ലൂര്‍ മലമുകളില്‍ തിരുവാതിര നക്ഷത്രംപോലെ ഇന്നും തിളങ്ങിനില്‍ക്കുന്ന വെളിച്ചത്തിന്റെ അകംപൊരുളുകള്‍.

പന്തിരുകുലത്തിലെ പെണ്‍സന്താനത്തെക്കുറിച്ച്‌ പന്തിരുകുലത്തിലെ ഏക പെണ്‍സന്താനമായ കാരയ്‌ക്കലമ്മയുടെ ജീവിതത്തിലെ സുപ്രധാന ഏടുകളാണ്‌ ഈ ഗ്രന്ഥത്തില്‍. കവളപ്പാറ കൊട്ടാരത്തിലെ അരുമയായി വളരുന്ന അവര്‍ ഭേദചിന്ത കൂടാതെ ഏവരുടെയും ദുരിതങ്ങളില്‍ സാന്ത്വനമായിത്തീര്‍ന്നു. കാലാന്തരേ അവര്‍ സ്വസഹോദരങ്ങളെ കണ്ടെത്തുന്നു, മാതൃശ്രാദ്ധത്തില്‍ പങ്കുചേരുന്നു. ഒടുവില്‍ ത്രികാലങ്ങളെ അതിക്രമിച്ച്‌ പരമപദം പ്രാപിക്കുന്നു.