ചെറുകാടിന്റെ നോവലുകൾ, നാടകങ്ങൾ മുതലായവയ്ക്കുള്ള ഒരു സവിശേഷത ഇതിനുമുണ്ട്. അദ്ദേഹത്തിൻ്റെ സ്വന്തം നാടായ വള്ളുവനാട്ടെ സാമൂഹ്യജീവിതമാണ് ഇതിലും പ്രതിഫലിച്ചിട്ടുള്ളത്. വള്ളുവനാടൻ സാമൂഹ്യജീവിതത്തിൻ്റെ കേന്ദ്രസ്‌ഥാനമായിരുന്ന നമ്പൂതിരിജന്മിത്വത്തിൻ്റെ ജീർണതയും തകർച്ചയുമാണ് ഇതിലദ്ദേഹം ചിത്രീകരിച്ചിട്ടുള്ളത്. ഇത്തരം സാമൂഹ്യനോവലുകളിൽ കല്‌പിത കഥകളും യഥാർഥകഥകളും കെട്ടുപിണഞ്ഞുകിടക്കുമല്ലോ. കല്പിതകഥാപാത്രങ്ങളും യഥാർഥത്തിൽ ജീവിച്ചിരുന്നിട്ടുള്ള മനുഷ്യരും തമ്മിൽ വേർതിരിച്ചറിയാൻ കഴിയാത്തത്ര സത്യസന്ധമാവലാണ് ഇത്തരം നോവലുകളുടെ മേന്മയ്ക്കടിസ്ഥാനം. ഇ.എം.എസ്. നമ്പൂതിരിപ്പാട്