ഒരു സ്പെഷ്യൽ ട്രെയിനിലെ അഞ്ഞൂറോളം വരുന്ന യാത്രക്കാർ, പതിനാലു ദിവസം ഒന്നിച്ചുണ്ടുറങ്ങി, സുഖദുഃഖങ്ങൾ പങ്കിട്ട്, അന്നോളം അവർക്ക് അജ്ഞാതമായിരുന്ന കുറെ സ്മാരകങ്ങൾ സന്ദർശിച്ചതിന്റെ അനുഭവങ്ങൾക്കു മേലെയാണ് ഈ പുസ്തകത്തിന്റെ ഉരുക്കുചക്രങ്ങൾ പായുന്നത്. നമ്മുടെ പൈതൃകമഹിമ ചൂളംവിളിച്ച് ഈ തീവണ്ടി ഭാരതത്തിന്റെ തെക്കും വടക്കും ഓടുന്നു. തമിഴ്നാട്, കർണാടക, ആന്ധ്ര, മഹാരാഷ്ട്ര, ഒഡിഷ, ബംഗാൾ അടക്കമുള്ള സംസ്ഥാനങ്ങളുടെ ചരിത്ര-സംസ്കാര-ജീവിതചിത്രങ്ങൾ ഇതിൽ ജാലകക്കാഴ്ചകളാകുന്നു. മണ്ണിൽ ചുവടുകൾ പതിഞ്ഞ ഇടങ്ങൾ മാത്രമല്ല, മനസ്സിൽ മുദ്രകൾ പതിച്ച മനുഷ്യർ കൂടി ഈ സഞ്ചാരത്തെ അവിസ്മരണീയമാക്കുന്നു.