സംസ്‌കൃതഭാഷയുടെ വാമൊഴി-വരമൊഴിയഴകുകൾ അറിയുവാനും ആസ്വദിക്കുവാനും ആഗ്രഹിക്കുന്ന ആർക്കും അവഗണിക്കുവാനാകാത്ത പഠനഗ്രന്ഥമാണ് ‘സിദ്ധരൂപം.’ ഈ ബാലപാഠപുസ്തകത്തെ ആസ്‌പദമാക്കിയായിരുന്നു കാലാകാലങ്ങളായി നമ്മുടെ കുട്ടികൾ സംസ്‌കൃതം അഭ്യസിച്ചിരുന്നത്. ഭാഷാധ്യയനത്തിൽ ഇത് പ്രാഥമികവും പ്രാമാണികവുമെന്ന ഖ്യാതി നേടി. ‘സിദ്ധരൂപം’ സ്വായത്തമാക്കിയ വിദ്യാർഥികൾ തുടർന്ന് ഭാഷാവ്യുത്പത്തിയാക്കി ആശ്രയിച്ചിരുന്ന ‘ബാലപ്രബോധന’ വും ‘ശ്രീരാമോദന്ത’ വും കൂടി ഉൾപ്പെട്ടതാണ് ഈ പുസ്‌തകം. ‘ബാലപ്രബോധനം’ വ്യാകരണ നിയമങ്ങളുടെ ലളിതമായ പ്രതിപാദനമാകുമ്പോൾ, ‘ശ്രീരാമോദന്തം’ കാവ്യാനുശീലനത്തിലേക്കുള്ള പ്രവേശനകവാടമായി മാറുന്നു.