വളരെ സാധാരണക്കാരായ ചില മനുഷ്യരുടെ നിറപ്പകിട്ടില്ലാത്ത ജീവിതങ്ങളും, അവ പ്രദാനം ചെയ്ത അനുഭവങ്ങളുമാണ് ഈ പുസ്തകത്തിന്റെ പ്രമേയം. ഒരായുഷ്ക്കാലത്തെ വൈവിധ്യപൂർണ്ണമായ ജീവിതാനുഭവങ്ങളുടെ പിൻബലത്തോടെ ഉരുത്തിരിയുന്ന ചിന്തകൾ ഈ രചനയെ ഗൗരവമുള്ളതാക്കിത്തീർക്കുന്നു. എത്ര സ്വാഭാവികമായും സന്ദർഭാനുസാരിയുമായിട്ടാണ് ഈ കുറിപ്പുകളിൽ വലിയ ചിന്തകൾ മിന്നൽപോലെ കടന്നുവരുന്നത്. അതേസമയം നിരുപദ്രവവും നിഷ്കളങ്കവുമായ നർമ്മം പല അവസരങ്ങളെയും വ്യക്തികളെയും അവിസ്മരണീയമാക്കുന്നുമുണ്ട്. രമണമഹർഷിയെക്കുറിച്ചുള്ള ആഖ്യാനം വളരെ ഗൗരവത്തോടെ കാണേണ്ട ഒന്നാണ്. ഒന്നാംസ്വാതന്ത്ര്യസമരമെന്നു വിശേഷിപ്പിക്കാവുന്ന “വെല്ലൂർ കലാപ’ത്തെപ്പറ്റിയുള്ള ലേഖനവും വേറിട്ടുനിൽക്കുന്നു.

– ഡോ. എസ്.കെ. വസന്തൻ